همام الزهراني رد:
August 30th, 2010 في 3:39 am

أفهم من كلامك إن البزنس موديلز في كل المنتجات لازم تكون متطابقة؟ كلام غير منطقي.الشيء الوحيد المشترك إن الكل يبغى يكفل حقه المشروع، و شركات/وكالات السيارات لها طرقة المختلفة في ضمان عدم خسارتها (بس طبعا ما توصل لحد دفع رسوم تشغيل مكيف – مسجل لأنه وقتها الموضوع بيصير تهريج).

إذا تبغى تقارن ببزنس موديل السيارات ففي أشياء لازم تكون واضحة عندك. شركات/ وكالات السيارات في العالم تطلع ربح هامشي بسيط من عملية بيع السيارة ومتفاوتة من مصنع إلى آخر لكن الأرباح الحقيقية تأتي من عمليات الصيانة وبيع قطع الغيار.

انت لمن تشتري سيارة مستخدمة في كل الأحوال بتكون مجبر ترجع للوكيل أو أي موزع له حتى تشتري قطع غيار بشكل دوري لها، معناته الشركة برضه بتستفيد منك ماليا سواء اشتريتها منهم جديدة أو اشتريتها مستخدمة من شخص ما.

و مع ذلك في حالة شرائك لها مستخدمة أقدر أضمن لك إن في ميزات ماراح تحصل عليها و أولها ضمان السيارة. لو صاحب السيارة الأصلي تجاهل عملية صيانة دورية واحدة راح تجي على راسك و بينلغى الضمان عليك و ما بيكون لك أي حق في المطالبة باستمرارية ضمان السيارة و إن كانت جديدة (هذا إذا ماكان ملغي بسبب انتهاء الكيلومترات المخصصة للضمان). مثال آخر هو إنه إذا صاحب السيارة الأصلي ضيع المفتاح السبير هنا أيضا ما بيكون لك حق ترجع للوكيل تطالبه بمفتاح سبير بل راح تكون مرغم إنك تدفع قيمة واحد جديد (يعجبني هذا المثال، مفتاح تم استخدامه و ضاع vs أونلاين باس/كود تم استخدامه و انلغى).

في بزنس موديل الألعاب، مصدر الربح الأساسي هي اللعبة المباعة للمستهلك الواحد بعدين تجي المحتويات القابلة للتحميل.

في كل لعبة مستخدمة تباع هناك لعبة جديدة تخسرها الشركة الصانعة وتضيع فرصة الكسب المجزي منها للأبد. الكسب من المحتويات القابلة للتحميل يظل غير كبير و مافي عمليات صيانة أو قطع غيار للاسطوانة المباعة ومافي عملية جباية أموال اشتراكاك أونلاين في غالب الألعاب لأنها مجانية من قبل الشركة الناشرة.. بل بالعكس الشركة جالسة تخسر و تصرف أموال على عملية تشغيل وصيانة السيرفرات..يعني الشركة مش قاعدة تستفيد من المستهلك ربحيا ما بعد البيع إلا في نطاق ضيق.

الشركة من حقها إنها تسعى لأكبر ربحية و أكبر عدد مبيعات لألعابها، وطالما في ناس ودها تلعب معناته لازم يكون عندها استعداد إنها تدفع.

المشكلة إلي يسمع الفريق المعارض لنظام مثل نظام EA يشعر وكأن الشركات جالسة تطالب بمبالغ خيالية، كل الناس تشتري الألعاب الجديدة بسعر كامل والي مش مقتنع بمستوى اللعبة أو مش مستعجل عليها ينتظر لين يرخص سعرها. تبغى تشتري مستخدم وتكسب طرف ثاني أوكي خيار راجع لك لكن إذا تبغى تلعب على سيرفراتنا الي نصرف فلوس على تشغيلها وصيانتها تدفع 10 دولار فضلا لا أمرا.. هذا الي بتوصله الشركات بكل وضوح وشفافية بل أقول بكل أدب و احترام.. حتى المبلغ مش ذاك المبلغ الكبير.. ال 34 ريال هذي تلقى الواحد يصرفها في وجبة عشاء أو في طلعة كوفي شوب لكن تلقاه يستخسر يدفعها في لعبة راح تمتعه لفترة طويلة.

الشيء الغريب هو الي الشخص الي تلقاع مستعجل على اللعبة وميت عليها وما يبغى يدفع سعر 60 دولار زيه زي بقية العالم لا و الأنكى إنه بعد فترة يبغى يبيعها! طيب ليش الهيلمان هذا كله إذا اللعبة ماراح تجلس معاك؟! هههههه شيء عجيب.

والأكثر غرابة هو الشخص إلي يقعد يشتري أكوام ألعاب ويجلس يبيع فيها بعدين و كأنه تاجر أو صاحب محل ويبغى يتكسب من هذا البزنس، يعني الهدف صار إن الواحد يشتري أكبر عدد من الألعاب علشان يجربها و يخلصها بسرعة بعلشان يلحق يبيعها بسعر عالي؟

هنا الثقافة تلعب دورها الحاسم.. في ناس تتعامل مع ألعاب الفيديو كثقافة (تحب يكون عندها كولكشنز – تحب يكون لها ذكرى جميلة ترجع لها – كلاسيكس مرصوصة في الرف حتى تظهر ذوقها) وفي المقابل في ناس تبغى تلعب والسلام.. شغل السووووني يواد وحط الديسك جوووة نزل الأسرار من النت ختم اللعبة في يومين طبقها و بيعها.

ههههههه كل واحد من حقه ينام على الجنب الي يريحه والناس مش سوى، أنا مش ضد إن الواحد يشتري ألعاب مستخدمة إذا تحققت له مصلحة فيها بالعكس تماما، كل إلي أبغى أوصله هو إني أتفهم تماما موقف الشركات و ما ألومهم البتة في تطبيق أنظمة مشابهة.

0  0